Kina po ndërmerr një hap të madh për të mbështetur sistemin e saj financiar, duke injektuar 360 miliardë juanë, rreth 46,1 miliardë euro, në tetë banka dhe kompani shtetërore të sigurimeve, në një kohë kur rritja ekonomike e vendit po ngadalësohet, raportoi “Euronews”.
Pjesa më e madhe e fondit, rreth 290 miliardë juanë (37,2 miliardë euro), do të shkojë për bankat, me qëllim forcimin e kapacitetit të tyre, për të vazhduar kreditimin dhe mbështetjen e ekonomisë.
Ndër përfituesit kryesorë janë Banka Bujqësore e Kinës dhe Banka Industriale dhe Tregtare e Kinës, dy bankat më të mëdha në vend.
Ndërkohë, fonde do të marrin edhe kompani të mëdha shtetërore të sigurimeve.
Sektori financiar kinez, është përballur me presion nga normat e ulëta të interesit, dobësimi i kreditimit dhe kthimet më të ulëta nga investimet.
Qeveria gjithashtu u ka kërkuar institucioneve financiare të mbështesin tregun vendas të aksioneve.
Kjo ndërhyrje konsiderohet si një nga paketat më të mëdha të mbështetjes për sistemin financiar kinez gjatë këtij viti.
ATSH