Një sukses i jashtëzakonshëm për Serena Markun, 12-vjeçaren nga Lezha, e cila u shpall fituese e Dilettando 2026, në finalen e zhvilluar në Teatro Moderno të Grossetos.
Me një interpretim të mrekullueshëm të këngës “Think” të Aretha Franklin, Serena mahniti publikun dhe jurinë, duke fituar vendin e parë dhe trofeun prestigjioz “Natalino Galgani”.
Pavarësisht moshës së saj të re, këngëtarja e talentuar lezhjane Serena Marku tregoi një pjekuri të jashtëzakonshme artistike dhe një zë të fuqishëm, duke interpretuar me shumë profesionalizëm një prej këngëve më të vështira të repertorit soul.
“Serena Marku është mbretëresha e Dilettando con Avis 2026. Këngëtarja e re 12-vjeçare, e lindur në Shqipëri dhe me banim në Grosseto, fitoi vendin e parë në podium në finalen e madhe të zhvilluar në Teatro Moderno të Grossetos, në përfundim të edicionit të 23-të të këtij aktiviteti.
Për Serenën, e cila në skenë dhuroi një interpretim të shkëlqyer të këngës “Think” të Aretha Franklin, erdhi edhe Çmimi prestigjioz “Natalino Galgani”, trofeu historik që shoqëron finalen e Dilettando-s dhe që i kushtohet kujtimit të Natalino Galganit, një figurë shumë e dashur dhe pikë referimi për breza të të rinjve të Grossetos.
Serena fitoi publikun dhe jurinë me një interpretim të një niveli të lartë, pavarësisht moshës së saj shumë të re. Zëri i saj arriti të përballojë një këngë mjaft të vështirë nga repertori ndërkombëtar soul, duke konfirmuar talentin dhe përgatitjen që e kishin çuar deri në finalen e madhe”, shkruajnë mediat italiane.
Ky është një tjetër sukses i madh për Serena Marku, e cila vijon të shkëlqejë në skenat italiane.
Ky triumf vjen pas një tjetër eksperience të rëndësishme për Serenën në skenën muzikore italiane. Në fillim të vitit 2026, ajo u bë pjesë e “The Voice Kids of Italy”, ku mahniti jurinë me interpretimin e këngës “I Wanna Dance With Somebody” të Whitney Houston.
Në atë konkurs, Serena zgjodhi të bëhej pjesë e ekipit të artistes së njohur italiane Loredana Bertè.
Nga një vajzë e vogël me një ëndërr të madhe, Serena Marku po ndërton hap pas hapi një rrugëtim artistik që po tërheq vëmendjen e publikut italian dhe shqiptar.
Serena Marku, një zë i vogël, një talent i madh dhe një emër që po bëhet gjithnjë e më i njohur në skenat italiane.
Lindita Kokaj