Protesta e 86-të kundër qeverisë Rama është mbyllur në Tiranë me thirrjet “Nesër më shumë” dhe “Bashkohuni me ne”, ndërsa organizatorët kanë paralajmëruar vijimin e qëndresës edhe në ditët në vijim.
Për 86 ditë me radhë, protestuesit kanë marshuar në rrugët e kryeqytetit duke kërkuar dorëheqjen e kryeministrit Edi Rama dhe ndryshime politike në vend.
Pas fjalimeve pranë Kryeministrisë, qytetarët kanë vijuar marshimin, të shoqëruar me thirrje kundër qeverisë dhe figurave politike.
“Rama, jep dorëheqjen!”, “Ju erdhi fundi!”, “Arrestoni Ramën!” dhe “Rama në burg, Berisha në burg!” ishin disa nga sloganet e dëgjuara gjatë protestës. Protestuesit kanë kërkuar gjithashtu arrestimin e Belinda Ballukut.
Ata shprehen se nuk mjaftojnë ndryshimet në kabinetin qeveritar dhe se kërkesa kryesore mbetet largimi i Edi Ramës.
Protestuesit e kanë cilësuar qëndresën si një kundërshtim ndaj qeverisë dhe klasës politike në tërësi, ndërsa kanë deklaruar se do të vijojnë protestat.
“Ju erdhi fundi! Poshtë oligarkia!”, “Shqipëria e rinisë, jo e partisë” u dëgjua gjatë marshimit, i cili u mbyll me thirrjen “Nesër më shumë”.m.k
