Policia ka arrestuar 11 persona dhe ka shpallur në kërkim 2 të tjerë në kuadër të hetimeve për vrasjen e 20-vjeçarit portugez në Ksamil, ngjarje e ndodhur mëngjesin e 18 gushtit në ambientet e lokalit “Principote” dhe më pas në plazhin “Paradise”.
Në pranga ka rënë autori i dyshuar i vrasjes, Sokrat Lipan alias Sokrat Vata, 29 vjeç, banues në Helshan të Hasit. Ai u kap në Levan të Fierit, i fshehur në bagazhin e një automjeti që drejtohej nga Ezgi Perlak, 31 vjeçe, ndërsa në automjet ndodhej edhe Nuh Mahmutoglu, 38 vjeç. Të dy janë shtetas turq dhe, sipas Policisë, e kishin fshehur Vatën për ta transportuar drejt Tiranës.
Në kuadër të hetimeve janë arrestuar gjithashtu Serxhi Selimi, 24 vjeç, Ervis Bunci, 24 vjeç, Ildi Cekani, 21 vjeç, dhe Murat Zhabina, 27 vjeç. Sipas Policisë, këta persona, të cilët punonin si kamarierë në lokal, dyshohet se kanë goditur më herët me grushte 20-vjeçarin dhe më pas janë larguar nga vendi i ngjarjes.
Për veprën penale të moskallëzimit të krimit janë arrestuar edhe Miosid Matushaj, 24 vjeç, Luçiano Seferi, 44 vjeç, Romeo Shehu, 35 vjeç dhe Kristi Koshi, 29 vjeç. Sipas hetimeve, ata ndodheshin në lokal në rolin e punonjësve të sigurisë dhe nuk kanë ndërhyrë për parandalimin e ngjarjes, ndërsa pas saj nuk kanë njoftuar Policinë e Shtetit. Miosid Matushaj është punonjës i Policisë së Shtetit në Drejtorinë e Kufirit dhe Migracionit në Gjirokastër. Romeo Shehu është punonjës i Policisë Bashkiake Gjirokastër dhe Luciano Seferi punonjës i burgut të Fierit.
Ndërkohë, janë shpallur në kërkim David Heurtevent, 29 vjeç, banues në Tiranë, dhe Bekim Bulica, 36 vjeç, banues në Tiranë.
Sipas Policisë, David Heurtevent dyshohet se ka goditur me grushte 20-vjeçarin në momentin kur Sokrat Vata e ka qëlluar me thikë. Të dy dyshohen për veprën penale “Vrasje me dashje”, kryer në bashkëpunim.
Ngjarja ndodhi rreth orës 05:15, kur gjatë një konflikti mes disa personave, në ambientet e “Principote” dhe më pas në plazhin “Paradise”, Sokrat Vata dyshohet se ka goditur disa herë me thikë turistin portugez, i cili humbi jetën.
Në total, në Komisariatin e Policisë Sarandë janë shoqëruar 41 persona për t’u marrë në pyetje. Hetimet janë kryer në bashkëpunim me Prokurorinë dhe me përdorimin e metodave speciale të hetimit, për të dokumentuar rolin e të gjithë personave të përfshirë.
Materialet hetimore i janë referuar Prokurorisë së Sarandës, ndërsa hetimet vijojnë për zbardhjen e plotë të ngjarjes dhe vënien para përgjegjësisë ligjore të personave të përfshirë.a.b
