Policia e Shtetit ka ngritur alarmin për raste të reja të mashtrimeve online, përmes mesazheve SMS dhe aplikacioneve të komunikimit, përfshirë WhatsApp-in.
Sipas policisë, autorët paraqiten në mënyrë të rreme si përfaqësues të bankave dhe u kërkojnë qytetarëve të përditësojnë të dhënat bankare, të verifikojnë llogarinë ose të kryejnë veprime të tjera përmes një linku të dërguar në mesazh.
Bëhet fjalë për skema të njohura si “phishing”, të cilat synojnë marrjen e kredencialeve të e-banking, kodeve të verifikimit OTP, PIN-it dhe të dhënave të kartave bankare. Këto informacione mund të përdoren më pas për transaksione të paautorizuara dhe dëme financiare.
Policia u bën thirrje qytetarëve të mos klikojnë në linke të dyshimta dhe të mos japin përmes tyre fjalëkalime, kode OTP, PIN apo të dhëna të kartës bankare.
Gjithashtu, qytetarët këshillohen të kontrollojnë adresën e faqes së internetit përpara se të identifikohen në shërbimet bankare dhe të përdorin vetëm kanalet zyrtare të bankës.
Nëse keni klikuar në një link të dyshimtë ose keni dhënë të dhënat bankare, policia këshillon që të kontaktoni menjëherë bankën për bllokimin e kartës apo llogarisë, të ndryshoni fjalëkalimet e aksesit dhe të raportoni rastin pranë Policisë së Shtetit, Drejtorisë për Hetimin e Krimeve Kibernetike ose drejtorive vendore të policisë.
“Mos klikoni. Mos jepni të dhëna. Verifikoni gjithmonë përmes kanaleve zyrtare”, apelon Policia e Shtetit.
