Luciano Spalletti nuk është i kënaqur me repartin ofensiv të Juventusit dhe kërkon me ngulm një sulmues tipik zone. Në listën e klubit mbeten Zirkzee dhe Sørloth, por në skenë është rikthyer edhe Jean-Philippe Mateta. Pakënaqësia e Luciano Spallettit me merkaton e Juventusit në sulm është bërë gjithnjë e më e dukshme. Trajneri bardhezi e ka të qartë se për idenë e tij të futbollit skuadrës i nevojitet një “numër 9” i mirëfilltë, një sulmues që të ketë praninë dhe instinktin e duhur brenda zonës.
Kjo u kuptua edhe nga fjalët e Spallettit drejtuar Kolo Muani pas ndeshjes me Frosinonen. Tentativa për të motivuar sulmuesin francez zbuloi edhe një dozë nervozizmi për faktin se kërkesa e tij kryesore që prej mbërritjes në stolin e Juventusit ende nuk është plotësuar.
Juventusi nuk arriti të mbajë Dusan Vlahovicin, ndërsa për Kolo Muanin investoi rreth 50 milionë euro, përfshirë bonuset. Megjithatë, francezi ka karakteristika të ndryshme dhe nuk konsiderohet profili klasik i bomberit që kërkon Spalletti.
Për këtë arsye, drejtuesit e Juventusit po vlerësojnë disa alternativa. Dy emrat më të përfolur janë Joshua Zirkzee dhe Alexander Sørloth. Zirkzee është një futbollist shumë i pëlqyer nga drejtori Massara, por profili i tij është më shumë ai i një sulmuesi që merr pjesë në krijimin e aksioneve sesa i një “vrasësi” të zonës.
Ndërkohë, Sørloth shihet si një alternativë më e afërt me atë që kërkon Spalletti. Një transferim i tij mund të lidhet edhe me të ardhmen e Nico Gonzalez, i cili mund të qëndrojë në Torino pas dëmtimit të Kenan Yildiz.
Në këtë situatë, Juventusi po shqyrton edhe një mundësi të tretë: Jean-Philippe Mateta. Sulmuesi francez ishte trajtuar edhe në janar, por marrëveshja nuk u realizua për shkak të problemeve fizike.
Tashmë pista është rikthyer në vëmendjen e klubit. Mateta nuk ka pranuar të rinovojë kontratën dhe fakti që marrëveshja e tij aktuale skadon në vitin 2027 ka bërë që çmimi i kërkuar nga Aston Villa të ulet. Shifra aktuale raportohet të jetë rreth 25 milionë euro.
Pikërisht këtu mund të hapet një skenar interesant. Sipas raportimeve nga Italia, Juventusi mund të tentojë të përfshijë në negociata Jonathan David. Sulmuesi kanadez vlerësohet gjithashtu rreth 25 milionë euro nga klubi torinez dhe më parë kishte shfaqur gatishmëri për të diskutuar një transferim te Villans. Nëse ky skenar bëhet realitet, Juventusi do të kishte në tryezë tri alternativa kryesore për sulmin: Zirkzee, Sørloth ose Mateta.