Kreu i Partisë Demokratike, Sali Berisha, ka ngritur shqetësimin për rritjen e çmimeve në Shqipëri, duke akuzuar qeverinë për mungesë reagimi ndaj vështirësive ekonomike të qytetarëve.
Në një deklaratë për mediat, Berisha u ndal te diferenca mes politikave të Shqipërisë dhe atyre të Greqisë, duke marrë si shembull masat e ndërmarra nga qeveria greke për uljen e kostos së produkteve të konsumit.
Sipas Berishës, Greqia ka vendosur të ndërhyjë për të ulur çmimet e rreth 1600 artikujve, me reduktime që, sipas tij, variojnë nga 5% deri në 30%. Lista përfshin produkte ushqimore bazë, artikuj shkollorë dhe mallra të përdorimit të përditshëm.
Berisha theksoi se ndërhyrja vjen pavarësisht faktit që, sipas tij, të ardhurat mesatare në Greqi janë ndjeshëm më të larta se në Shqipëri dhe çmimet janë më të ulëta.
Në të kundërt, kreu i PD-së akuzoi qeverinë shqiptare për mungesë masash ndaj rritjes së çmimeve.
“Çmimet në Shqipëri, sipas statistikave më të fundit, çmimet e ushqimeve në Shqipëri u rritën këtë vit 5 herë më shumë se sa mesatarja e vendeve të BE. Dhe qeveria ka zero reagim.”
Berisha e specifikoi më tej pretendimin e tij, duke deklaruar se rritja e çmimeve të ushqimeve në Shqipëri është 5.2 herë më e lartë se mesatarja e Bashkimit Evropian.
Sipas tij, rritja e çmimeve duhet parë në një kontekst më të gjerë ekonomik, pasi familjet shqiptare përballen me të ardhura më të ulëta dhe, njëkohësisht, me kosto të larta për produktet bazë.
Kreu i PD-së iu referua gjithashtu një tjetër të dhëne, sipas së cilës 30% e shqiptarëve kërcënohen nga uria, duke e cilësuar këtë situatë si një sinjal alarmi për gjendjen sociale në vend.
Berisha e akuzoi qeverinë e Edi Ramës për indiferencë ndaj krizës së kostos së jetesës dhe kërkoi ndërhyrje për lehtësimin e barrës ekonomike mbi qytetarët.
“Këto të dhëna, së bashku me të dhënat e tjera, të cilat faktojnë se 30 përqind e shqiptarëve kërcënohen nga uria, janë kambanat e alarmit më të trishtë që bien në këtë vend.”
Në përfundim, Berisha e cilësoi qëndrimin e qeverisë ndaj rritjes së çmimeve si një indiferencë që, sipas tij, ka pasoja të drejtpërdrejta për mirëqenien e familjeve shqiptare.r.p
