Për të 95-ën ditë radhazi, qytetarët kanë vijuar protestën kundër qeverisë së Edi Ramës, duke kërkuar dorëheqjen e panegociueshme të kryeministrit.
Protesta e mbrëmjes së sotme nisi përpara Kryeministrisë me fjalime dhe thirrje kundër qeverisë, ndërsa më pas protestuesit marshuan në rrugët e Tiranës.
“Ju erdhi fundi”, “Shqipëria kërkon revolucion”, “Rama, jep dorëheqjen” dhe “Arrestoni Ramën” ishin disa prej thirrjeve të dëgjuara gjatë tubimit.
Një pjesë e protestës u zhvendos te Blloku i Sigurisë, ku protestuesit kërkuan lirimin e personave të arrestuar një natë më parë gjatë protestës së 94-t para Kryeministrisë.
Protesta e së martës u shoqërua me tensione dhe përplasje mes protestuesve dhe Policisë së Shtetit, ndërsa 14 persona u arrestuan dhe 3 të tjerë u proceduan në gjendje të lirë.
Përpara Bllokut të Sigurisë, qytetarët kanë shprehur mbështetjen për të arrestuarit me thirrjet: “Nuk jeni vetëm”, “Lironi çunat, lironi gocat” dhe “Arrestoni Ramën”.
Më pas, protestuesit kanë vijuar marshimin drejt sheshit “Skënderbej”, duke shoqëruar lëvizjen me thirrje kundër kryeministrit dhe qeverisë.
“Duam dorëheqje” dhe “Rama ciao, Rama ciao” ishin disa prej thirrjeve të protestuesve, ndërsa gjatë marshimit u dëgjua edhe slogani: “Në shtator, jo mungesa me studentët, shtohet shpresa”.
Në përfundim të protestës së 95-të, qytetarët deklaruan se qëndresa do të vijojë edhe në ditët në vazhdim, deri në dorëheqjen e kryeministrit Edi Rama.
Protestuesit kanë paralajmëruar një mobilizim më të madh më 7 shtator, kur shënohen 100 ditë nga nisja e protestave.a.b
