Trajneri i Ipswich Town, Gary O’Neil, ka vlerësuar maksimalisht paraqitjet e Anis Mehmetit gjatë fazës përgatitore, por vendimet e fundit lënë të kuptohet se sulmuesi i Kombëtares shqiptare nuk bën pjesë në planet e tij për sezonin e ri.
Pas ndeshjes së parë të kampionatit ndaj Sunderlandit, O’Neil foli me superlativa për Mehmetin, edhe pse nuk e përfshiu shqiptarin as në listën e 18 lojtarëve.
“Ka qenë i shkëlqyer për mua gjatë fazës përgatitore. Ka punuar jashtëzakonisht shumë çdo ditë. Ishte një vendim shumë i vështirë, sepse nuk mund të kërkoja më shumë prej tij”, deklaroi trajneri anglez.
Megjithatë, situata e krijuar së fundmi flet për një tjetër realitet. Ipswich luan sot në Kupën e Ligës ndaj Leicesterit, një ndeshje ku O’Neil ka zgjedhur të aktivizojë disa prej lojtarëve që nuk patën minuta në kampionat.
Por edhe në këtë rast, Mehmeti nuk është përfshirë as në formacion dhe as në pankinë, duke forcuar bindjen se klubi po kërkon një zgjidhje për të ardhmen e tij.
Për sulmuesin shqiptar nuk mungojnë alternativat. Disa klube të Championship kanë shfaqur interes konkret dhe janë të gatshme të tentojnë transferimin e tij.
Mes skuadrave që kanë pyetur për Mehmetin janë Wrexham, Birmingham City, Millwall dhe Derby County.
Mehmeti kërkon një klub ku mund të ketë hapësirën dhe minutat e nevojshme për të vazhduar zhvillimin e tij, ndërsa Ipswich duket gjithnjë e më i hapur për ta lënë të largohet.