Lëvizja Vetëvendosje tashmë i ka përcaktuar emrat që mund t’i propozojë për postin e presidentit të Kosovës, por për momentin nuk do t’i bëjë publikë. Kështu ka deklaruar ministri në detyrë i Punëve të Jashtme dhe Diasporës, Glauk Konjufca, duke e lidhur këtë me negociatat që pritet të zhvillohen me Lidhjen Demokratike të Kosovës.
Sipas Konjufcës, publikimi i emrave në këtë fazë do të mund ta vështirësonte arritjen e një marrëveshjeje mes dy partive. “Lëvizja Vetëvendosje është gati. Kryeministri Kurti është gati. Emrat i kemi, por nuk mund t’i ndaj me ju, pasi kjo do ta humbte procesin e negocimit”, deklaroi Konjufca.Ai tha se tashmë pritet që edhe LDK-ja të jetë e gatshme për zhvillimin e takimeve, duke iu referuar deklaratës së kryetarit të saj, Lumir Abdixhiku, se gjatë kësaj jave do të zhvillohen diskutime.
“Edhe LDK-ja besoj se së shpejti do të jetë gati, pasi javën e kaluar kryetari Abdixhiku tha se kjo javë do të jetë ajo që ata do të takohen”, tha Konjufca. Ministri në detyrë shtoi se, deri në këtë moment, kryeministri Albin Kurti nuk ka marrë një ftesë konkrete nga Abdixhiku për takimin e paralajmëruar.
“Sa kam marrë vesh unë, në LVV kryeministri Kurti ende s’ka një ftesë apo diskutim se cila do të jetë dita e kësaj jave”, u shpreh ai. Konjufca vlerësoi se zhvillimi i takimit mes LVV-së dhe LDK-së mund ta afrojë dukshëm një marrëveshje për çështjen e presidentit. “Kur kjo të ndodhë, atëherë mendoj se do të jetë shumë afër marrëveshja për presidentin”, deklaroi ai.