Situata e zjarrit në fshatrat e zonës së Ulzës vijon të jetë alarmante. Flakët janë përhapur në një perimetër prej rreth 5 kilometrash dhe rreziku është afruar ndjeshëm pranë banesave. Pritet që në çdo moment të nisë evakuimi i banorëve që jetojnë në zonat më të rrezikuara. Era e fortë dhe bimësia e thatë po favorizojnë përhapjen e shpejtë të flakëve, duke e bërë të vështirë ndërhyrjen e forcave në terren.
Dhjetëra efektivë të shërbimit zjarrfikës, shërbimit pyjor, mbrojtjes civile, Forcave të Armatosura dhe vullnetarë po vijojnë përpjekjet për të vënë situatën nën kontroll. Megjithatë, terreni i vështirë dhe intensiteti i zjarrit kanë penguar deri tani frenimin e tij.
Një tjetër problem serioz është tymi i dendur që ka përfshirë zonën, duke kufizuar ndjeshëm fushëpamjen dhe duke rritur rrezikun për shëndetin e forcave që po operojnë në terren.
Një helikopter i Ministrisë së Mbrojtjes po kryen hedhje uji mbi vatrat e zjarrit, por deri në këto momente flakët vijojnë të përhapen dhe situata mbetet kritike.