Një lajm i rëndë ka tronditur mbrëmjen e kësaj të mërkure publikun. Laurent Krasniqi, i njohur përmes rrjeteve sociale dhe ish-banor i Big Brother Kosova Vip 3, ka humbur tragjikisht jetën pas një aksidenti të rëndë me motor në Prishtinë.
Aksidenti ndodhi të mërkurën mbrëma, në fshatin Llukar të Prishtinës, ku një motoçikletë dhe një automjet u përfshinë në një përplasje të rëndë. Krasniqi, i lindur në vitin 1997, u dërgua me urgjencë në Klinikën Emergjente të QKUK-së nga ekipi i Ndihmës së Shpejtë, por fatkeqësisht pa shenja jete. Pavarësisht përpjekjeve të mjekëve dhe masave të reanimimit, ai nuk arriti t’u mbijetojë plagëve të marra. Vdekja e tij u konstatua në orën 21:40.
Lajmi është konfirmuar nga drejtori i Klinikës Emergjente, Naser Syla, si dhe nga Policia e Kosovës. Laurent Krasniqi ishte një figurë e njohur për shumë të rinj përmes rrjeteve sociale. Me energjinë dhe personalitetin e tij, ai arriti të krijojë një komunitet të madh ndjekësish, ndërsa pjesëmarrja e tij në Big Brother VIP Kosova e bëri edhe më të njohur për publikun e gjerë.
