Aktori i njohur shqiptar, Ndrek Luca, është përjetësuar në një mozaik në kompleksin “Rozafa Apollonia” në Shqipëri, në përkujtim të 99-vjetorit të lindjes së tij.
Lajmin e ka bërë të ditur djali i aktorit, Gjergj Luca, i cili e ka cilësuar këtë si një dhuratë historike dhe fisnike për të atin.
“Sot, më 3 shtator 2026, me rastin e 99-vjetorit të ditëlindjes së babës tim, Ndrek Luca, po e përkujtoj me një dhuratë historike e fisnike. Nga sot, baba im i shtrenjtë do të jetë i gjallë përherë në mozaikun e kompleksit Rozafa Apollonia”, ka shkruar ai në Facebook.
Ai ka theksuar se artistët e mëdhenj vazhdojnë të jetojnë përmes trashëgimisë së tyre artistike.
“Artistët e mëdhenj mbeten të gjallë vetëm me veprat e tyre plot dritë!”, ka shtuar ai.
Ndrek Luca, një prej emrave të njohur të teatrit dhe kinematografisë shqiptare, lindi më 3 shtator 1927. Ai ndërroi jetë më 16 janar 1993, duke lënë pas një karrierë të pasur artistike.
Pasi punoi disa kohë si ushtarak në aviacion, qysh nga viti 1950 vijoi si aktor në Teatrin Popullor me rolin e Kelv Dhembacit në dramën “Halili dhe Hajria” të Kolë Jakovës. Spikati më vonë me rolin e Jagos në tragjedinë e Shekpsirit “Otello”, dhe në dramën “Toka jonë” të Kolë Jakovës. Në dramën Arturo Ui të Brehtit, Ndrek Luca luajti rolin e Xhirit duke sendërtuar me një gjuhë shprehëse, përkitazi parimeve brehtiane të teatrit, planet satirike me ato dramatike. Krijoi një karakter të spikatur e realist me rolin e Brung Trolit (drama “Përmbytja e madhe” e K. Jakovës), kurse në dramën “Baca i Gjetajve” të Fadil Krajës interpretoi rolin e Bacës, një malësor trim, dinjitoz, i përmbajtur, ku është e pranishme po aq edhe një kahje e fortë dramatike.
Luca operonte me plane të ndryshme interpretative, sa komike, po aq tragjike, sa heroike, po aq të rëndomta, duke e “thyer” modelin paraprak. Është nga aktorët e zëshëm të filmit artistik shqiptar, duke realizuar mbi 30 figura, të veçanta në llojin e tyre, si Dom Pali (“Komisari i dritës”), Ndrio (“Udha e shkronjave”), Gjini (“Plagë të vjetra”), Pjetër Mustakuqi (“Operacioni Zjarri”), Ramiu (“Duel i heshtur”) etj. Ndrek Luca zotëronte një mimikë tepër ekspresive; përdorte me mençuri gjestin e figurshëm dhe mjete të tjera të njëmendësimit pamor të personazhit.
