Kryebashkiaku i Londrës, Sadiq Khan, është dënuar dhe gjobitur pasi u akuzua se nuk kishte paguar taksën vjetore për një makinë 24-vjeçare, të cilën ai pretendon se nuk e ka pasur kurrë në pronësi.
Politikani laburist, 55 vjeç, u shpall fajtor muajin e kaluar nga një gjykatës në kuadër të një procedure të përshpejtuar gjyqësore, pasi Agjencia e Licencimit të Shoferëve dhe Automjeteve (DVLA) e ndoqi penalisht për mbajtjen e një automjeti të palicencuar.
Bëhet fjalë për një Nissan Micra ngjyrë blu, të regjistruar për herë të parë në vitin 2002. Sipas të dhënave të gjykatës, taksa e automjetit kishte skaduar në shtator të vitit të kaluar dhe makina u konstatua duke qarkulluar pa taksë më 24 janar.
DVLA deklaroi se në regjistrat zyrtarë të qeverisë, emri dhe data e lindjes së Sadiq Khan figuronin të lidhura me automjetin. Megjithatë, zyrtarët e Bashkisë së Londrës kanë mohuar se makina i përkiste.
Rasti mori një tjetër kthesë pasi letrat e DVLA-së, përfshirë njoftimin për detyrimin e papaguar, nuk u dërguan në zyrat e Transportit të Londrës, por në një restorant të Gordon Ramsay-t në lindje të Londrës, që ndodhet pranë tyre.
Për shkak se letra nuk mori përgjigje dhe ndaj akuzës nuk u paraqit asnjë pretendim, Khan u shpall fajtor në mungesë. Gjykata e urdhëroi të paguante një gjobë prej 220 paundësh, 85 paund shpenzime gjyqësore dhe 35.84 paund taksën e papaguar të automjetit. Në total, detyrimi arrin në 340.84 paund.
DVLA ka deklaruar se po rishikon çështjen dhe po heton rrethanat që çuan në ndjekjen penale të kryebashkiakut.
Sadiq Khan mund të kërkojë rihapjen e çështjes duke deklaruar se nuk ishte në dijeni të procedimit, pasi njoftimet ishin dërguar në adresën e gabuar. Nëse çështja rihapet, ai mund të kërkojë tërheqjen e akuzës ose të deklarohet i pafajshëm.