Këshilli i Lartë Gjyqësor i ka kërkuar sot Ministrisë së Financave ekzekutimin e pagave të muajit gusht për magjistratët, duke argumentuar se listëpagesat janë përgatitur dhe dorëzuar pranë degëve të Thesarit në përputhje me legjislacionin dhe buxhetin e miratuar. Përmes një shkrese zyrtare drejtuar Ministrisë së Financave, KLGJ bën të ditur se, në disa gjykata, përfshirë Durrësin, Fierin dhe Gjirokastrën, listëpagesat dhe urdhërshpenzimet janë verifikuar e miratuar nga strukturat e Thesarit, por pagesat kanë mbetur të bllokuara në banka.
Sipas KLGJ-së, vendimet e Gjykatës Kushtetuese janë përfundimtare dhe të detyrueshme për zbatim. Këshilli argumenton se mosveprimi i Kuvendit nuk mund të përdoret si arsye për pezullimin e efekteve të vendimit kushtetues apo për cenimin e pagës së magjistratëve. “As Kuvendi, as Këshilli i Ministrave, Ministria e Financave apo çdo organ tjetër shtetëror nuk mund të rihapë, rivlerësojë apo relativizojë atë që Gjykata Kushtetuese ka vendosur përfundimisht”, thekson KLGJ.
Në përmbyllje të letrës, KLGJ i kërkon zyrtarisht Ministrisë së Financave ekzekutimin e menjëhershëm të pagave të muajit gusht për të gjithë nëpunësit e administratës gjyqësore që nuk preken nga ky vendim, si dhe kalimin e pagave për magjistratët e të tria niveleve të gjykatave.
Në muajin shkurt, Gjykata Kushtetuese pranoi pjesërisht kërkesën e Unionit të Gjyqtarëve dhe shfuqizoi dispozitat e një ligji të 2023-it që kishin ndryshuar formulën e përllogaritjes së pagave, duke lënë si pagë reference atë të drejtorit të Departamentit në Këshillin e Ministrave dhe jo pagën e Presidentit të Republikës, që kishte vendosur mazhoranca.
Gjyqtarët pretenduan se formula e re kishte sjellë në praktikë një ulje të vlerës reale të pagës. Kushtetuesja e pranoi këtë argument dhe i la Kuvendit detyrimin për të bërë ndryshimet ligjore deri më 31 korrik 2026. Në fund të gushtit, KLGJ miratoi vetë një pagë referuese bazë për magjistratët, duke iu referuar vendimit të Kushtetueses dhe i kërkoi Ministrisë së Financave të zhbllokojë fondin, por Financat thonë se këtë mund ta bëjë vetëm Kuvendi.